மாபெரும் ஆர்பாட்டம்

தமிழகத்தில் பதினாறு இலட்சத்திற்கும் மேற்பட்ட மாற்றுத்திறனுடையோர்கள் வாழ்ந்துவருகின்றார்கள். இவர்களில் பெரும்பான்மையோர் சமூகம், பொருளாதாரம், இடபெயர்ச்சிபோன்றவற்றில் பின்தங்கிய நிலையிலும், அனைத்து நிலையிலும் மற்ற சாதாரண மக்களுடன் போட்டி போட முடியாத நிலையில் பல்வேறு இடர்பாடுகளுக்கிடையில் வாழ்ந்துவருகின்றனர் என்பது அனைத்து தரப்பினரும் தயங்காமல் ஏற்றுக்கொள்ளும் ஒரு உண்மை.

மத்திய அரசின்கீழ் இயங்கி வரும் ரயில்வே துறையில் மாற்றுத்திறனுடையவர்கள் எளிதில் பயணம் செய்ய அவர்களுக்கென்று தனியாக எட்டு பேர் மட்டுமே அமரக்கூடிய
வகையில் ரயில்பெட்டி கொடுக்கப்பட்டிருந்தது. அதில் அனைத்து வகை மாற்றுத்திறனாளர்களும் அதிக கூட்டமான சமையங்களில் கூட தங்களுக்கு ஒதுக்கப்பட்ட பெட்டியில் இருபதுக்கும் மேற்பட்ட நபர்கள் கூட பயணம் செய்ய ஏதுவாக இருந்தது.

ஆனால் கடந்த 01.08.2009 முதல் அந்த தனிபெட்டியில் சாதாரண பயண சீட்டு பெற்ற மாற்றுத்திறனாளர்கள் பயணம் இயலாது எனவும் முன்பதிவுசெய்த இரண்டு மாற்றுத்திறனாளர்கள் மற்றும் இரண்டு உதவியாளர்கள் ஆகமொத்தம் நான்கு நபர்கள் மட்டுமே பயணம் செய்யமுடியும் என ஆணையிடப்பட்டுள்ளது.
ரயில்வே துறையின் இந்த ஆணை மாற்றுத்திறனாளர்கள் மத்தியில் பெரும் பாதிப்பினையும், மன உளைச்சலையும் ஏற்படுத்தியுள்ளது. மத்திய அரசு இந்த ஆணை வெளியிட்டிருபத்தின் மூலம் மாற்றுத்திறனாளர்கள், சமூகத்தில் தடையின்றி வாழ வகைசெய்யும் கடமையிலிருந்து விலகி மாற்றுத்திறனாளர்களை பாகுபடுத்தி, தடைகளை ஏற்படுத்தியுள்ளது. ஆகா இவை மாற்றுத்திறனாளர்களுக்கு எதிரான உரிமை மீரல் என்பதனை உணர்வோடு தெரிவித்துகொள்கிறோம்.
மாற்றுத்திறனாளர்கள் எளிமையாகவும், உடனடியாகவும் பயணம் செய்யும்பொழுதும் அவர்களுக்கான தனிப்பெட்டி என்பது மிகவும் அவசியமான ஒன்றாகும். இதனை உணரதவறிய ரயில்வே நிர்வாகத்திற்கு மாற்றுத்திறனாளர்களின் உணர்வினை உணர்த்தும் விதமாக அனைத்துவகை மாற்றுத்திறனாளர்களும் கடந்த 01.09.2009 அன்று திருச்சிராப்பள்ளி ரயில் நிலையம் முன்பு காலை 10 மணி முதல் மதியம் 1 மணி வரை ஆர்ப்பாட்டம் நடத்தினர். இதில் திருச்சிராப்பள்ளி மாவட்டத்தை சேர்ந்த அனைத்துவகை மாற்றுத்திறனாளர்களும், அனைத்து மாற்றுத்திறனாளர்கள் சம்பந்தப்பட்ட சங்கங்களும் திருச்சிராப்பள்ளி மாவட்ட உடல் ஊனமுற்றோர் முனேற்ற சங்கத்துடன் இணைந்து ஆர்பாட்டத்தில் பெருந்திறலாக உணர்வுடன் பங்கேற்றனர்.