ஏப்.10ல் மாற்றுத் திறனாளிகளுக்கான இலவச மருத்துவ முகாம்

உயிர் காக்கும் உயர் சிகிச்சைக்கான கலைஞர் காப்பீட்டுத் திட்டத்தின் கீழ்,​ மாற்றுத் திறனாளிகளுக்கும் வருகிற ஏப்ரல் 10-ம் தேதி இலவச மருத்துவ முகாம் நடைபெறுகிறது என்றார் மாவட்ட ஆட்சியர் தா. சவுண்டையா.​ ​ திருச்சி மாநகராட்சிப் பகுதிக்குள்பட்ட மாற்றுத் திறனாளிகளுக்கான தொழில் பயிற்சியை மன்னார்புரம் விழியிழந்தோர் மகளிர் மறுவாழ்வு இல்லத்தில் அன்மையில் தொடக்கிவைத்து அவர் மேலும் பேசியது:​ ​ ​ 

புதிதாக உருவாக்கப்பட்டுள்ள மாற்றுத் திறனாளிகள் துறைக்கு தமிழக பட்ஜெட்டில் ரூ. 176 கோடி ஒதுக்கீடு செய்யப்பட்டுள்ளது.​ ​ ​ திருச்சி வெஸ்ட்ரி ஆங்கிலோ இந்தியன் மேல்நிலைப் பள்ளி மைதானத்தில் வருகிற ஏப்ரல் 10 ஆம் தேதி கலைஞர் காப்பீட்டுத் திட்டத்தின் கீழ் சிகிச்சை அளிக்கும் வகையில்,​ மாற்றுத் திறனாளிகளுக்கான இலவச மருத்துவ முகாம் நடைபெறுகிறது.​

இந்த முகாமில் 28 மருத்துவமனைகளைச் சேர்ந்த மருத்துவர்கள் பங்கேற்று சிகிச்சையளிக்க உள்ளனர். இலவசமாக மருத்துவப் பரிசோதனைகள் செய்து அறுவைச் சிகிச்சை மேற்கொள்ளப்படும்.​ ​ ​ தவிர,​ இந்த முகாமில் மாற்றுத் திறனாளிகளின் அனைத்துக் கோரிக்கைகளையும் நிறைவேற்றும் வகையில்,​ 10-க்கும் மேற்பட்ட சிறப்பு மையங்கள் அமைக்கப்பட்டு,​ பல்வேறு துறை அலுவலர்கள் மூலம் அவர்களின் குறைகள் அனைத்தையும் ஒரே இடத்தில் நிவர்த்தி செய்யும் வகையில் சிறப்பான ஏற்பாடுகள் செய்யப்படும்.​ ​ ​ 

மாற்றுத் திறனாளிகளுக்கு சுய வேலைவாய்ப்பை உருவாக்கும் வகையில்,​ ஒரு கால் செயலிழந்த 20 பெண்களுக்கு அழகுக்கலைப் பயிற்சியும்,​ பார்வையற்ற 20 பெண்களுக்கு ரெக்சின் பை தயாரித்தல் பயிற்சியும்,​ மூளை முடக்குவாதத்தால் பாதிக்கப்பட்ட மற்றும் மனநலன் குன்றிய 20 பேருக்கு காகிதப் பை தயாரித்தல் பயிற்சியும் அளிக்கப்படுகிறது.